Disyembre 20, 2009 - Misakay ko ug jeep pagkahuman sa akong paniudto padulong Compostela nga nagdala ug mga regalo alang sa usa ka kalihukan para sa mga bata nga nagkinahanglan panahon sa Pasko. Kining okasyon gidumala ug gipasiugdahan ni Abai Rolly Wagas, ang tawo luyo sa Radyo Bisdak. Isip usa ka first timer nga moadto sa maong lungsod, nangita ko ug jeep nga kinahanglang front seat jud ko dili kay aron una moabot kaysa luyo (hahaha) apan aron dili masaag sa padulngan. Miabot ko sa maong lugar pasado ala una na sa kahapunon.Una kong nahimamat si abai Noypi, bisdaker nga bag-uhay miabot gikan sa New York. Migahin gayod siya ug oras para Paskuhan sa Radyo Bisdak nga wala sad nagdugay kay mopauli pa sad siya sa Bohol. Gisugdan sa pag-ampo sa Kahitas-an isip pasalamat sa maanindot nga adlaw sa maong okasyon. Ang tinahod nga si Kapitan Rachel Wagas Canada, Brgy. Kapitan sa Poblacion Compostela mao ang mipadayag sa pulong pagsugat.
Gi-abi abi ug gipaila ila ang mga tawo nga nagpaluyo sa maong kalihukan ilabi na kadtong mga donors nga tua pa sa gawas sa nasod ug mga bisdakers nga mitambong sama nila ni abai noypi, abai choyax, abai vega gie, abai bahur, abai marvin, abai rock, dai simply_me, abai dionisio, abai jaycal, dai smart_girl, dai ph, dai yenyen ug ang project coordinator nga si abai bati nga gikan pa sad sa China.
Nindot kaayo pagasud-ungon ang mga bata sa ilang kalipay sa dihang gipanghatag na ang mga regalo pagkahuman sa ilang kaon ( kan-on, spaghetti, fried chicken ug softdrink) nga giandam gikan sa barangay.
Nalingaw ko sa parlor games sa mga bata. Sa usa nga duwa, nangita si abai bahur (emcee) ug tsinelas nga blue. Ang unang makadala sa tsinelas mao mahatagan ug premyo. Nagdinaganay ang mga bata padulong sa atubangan. Diha’y usa ka bata nga sa iyang huna-huna dili na siya makadaug, gilabay ang tsinelas padulong sa emcee para maoy mauna ug abot (hahaha). Laing duwa diin padad-on ang bata sa iyang lola sa atubangan. Nakatawa ko kay usa ka lola unya upat ka bata nagbinirahay kinsay makadala ngadto sa atubangan. Wala nasayop akong huna-huna nga pulos gyud diay apo kadtong mga bataa (hahaha).
Nahuman ang maong kalihukan nga nagbutang ug kalipay sa mga kasingkasing sa mga bata sa Brgy. Poblacion. Ug dako kaayo ang pasalamat sa Radyo Bisdak nga gipanguluhan ni Abai Rolly ngadto sa mga sponsors nga sila abai bisgat (Hongkong), abai timoy (California), abai MJ (California), abai nippy (New Jersey), abai badlungon (California), abai oming/vangie (Israel)ug si abai red hunter (Pennsylvania).
Mabuhi ang mga Bisaya! Mabuhi ang Radyo Bisdak!
Rachel Wagas Canada, Brgy. Captain, Poblacion, Compostela
Ang mga Bisdakers!
Mao kini ang upat ka mga bata nga nag-ilugay sa ilang Lola.
